یوں ہی سہی

چاند نکلے کہ نہ نکلے جاناں
درد کی رات گزر جائے گی
ٹیس ابھرے کہ نہ ابھرے دل میں
یہ مری آنکھ تو بھر جائے گی

اے مری جانِ تمنا، ترے بعد
سہہ بھی جاؤں جو ملامت کا عذاب
مگر اک بات سے ڈر لگتا ہے
میرے اجڑے ہوئے خوابوں کی کبھی
کوئی تعبیر نظر آئے گی؟
یا سسکتے ہوئے لمحوں کا کرب
میری آنکھوں میں اتر کر کسی شب
عکسِ جاناں کے حسیں لمحے کو
یادِ ماضی میں بدل ڈالے گا
اور پھر یہ مرا بے جان سا جسم
قرض کی طرح گزارے گا حیات
دوست آئیں گے دلاسا دینے
اپنے الفاظ کے مرہم لے کر

میں کہ اجڑا ہوا شہزادہ ہوں
میری تسکیں کو پری اترے گی
یا کہ پھر چاک لبادہ اوڑھے
اک مسیحائے نفس آئے گا
لیکن اِن سب سے مجھے کیا حاصل!
کون دے گا مجھے پُرسہ جاناں
کس نے سمجھا مجھے اپنا جاناں

اگر اِس میں بھی رضا ہے تیری
تب تو اے جانِ جہاں یوں ہی سہی
میری منزل ہے محبت تیری
چاہے جیسے بھی ہو، جس حال میں ہو
یوں نہیں تو چلو پھر یوں ہی سہی



Enjoy Reading This Article?

Here are some more articles you might like to read next:

  • How Machines Learn to Rebuild Particle Showers
  • Dark Matter: Evidence, Classification and Candidates
  • Evolution History of Universe: From 10 Seconds to 10 Billion Years
  • Evolution History of Universe: A Story from Zero to Ten Seconds
  • Causal Metric Hypothesis–I